KUMALAT sa social media ang litrato ni John Lloyd Cruz kung saan makikita na may kayakap itong matandang babae.
Nauna itong ipinost sa Instagram account ni @curly_chic73 na may caption na, “Mama’s favorite actor…John Lloyd Cruz.”
Makikita sa isang photo si John Lloyd na nakayakap sa may edad ng babae habang sa isang litrato ay tila nakikipagkuwentuhan at nakikipagbiruan pa ang aktor sa nasabing female fan.
Hindi naman sinabi ng netizen kung paano nag-meet ang dalawa at kung saan ito naganap.
Wala ring binanggit si @curly_chic73 kung kailan nangyari ang pagkikita ni JLC at ng kanyang mama.
Pinuri naman ng mga netizen si Lloydie dahil sa pagpapasaya niya sa kanyang fan na kahit hindi na siya visible sa showbiz ay binigyan pa rin niya ng time ang kanyang supporter.
Ang pagkalat ng nasabing IG photo ay lumabas sa gitna ng bali-balitang magbabalik na raw sa showbiz si John Lloyd. Ang chika, gagawa ng bagong commercial ang aktor kasama ang kaibigang si Piolo Pascual.
Mismong si Papa P kasi ang nag-post sa kanyang IG ng isang teaser poster para sa ineendorso niyang shawarma brand. Kamukha ni Lloydie ang nasa poster na may nakasulat na, “Ang pagbabalik.”
Caption ni Piolo sa kanyang post, “If that’s you, I’m happy coz [you’re] my brother. Welcome to the family.”
Maging ang dati niyang ka-loveteam na si Bea Alonzo ay napa-post din sa kanyang IG ng maikling video na may caption na, “Poy, ikaw ba yan?” Ang Poy o Popoy ay ang karakter ni JLC sa pelikula nilang “One More Chance kung saan gumanap naman si Bea bilang si Bash o Basha.