SA isang malaking golf tournament ay pinagpistahan ang mga utang ng isang actor-politician na matagal na niyang hindi nababayaran.
Matagal sa kanyang posisyon ang male personality, pero inalat siya kaya nawala sa puwesto, ngayon ay nakikipagsuntukan na naman siya sa buwan sa pag-asang makababalik pa siya.
Kuwento ng isang source, “Ewan naman kung saan niya dinala ang mga milyones na inutang niya sa mga kaibigan at kakilala niya. Lahat na lang yata ng makilala niya, e, inuutangan na niya agad-agad!
“Meron siyang drama na may ipinagawa siyang project sa lugar na siya ang pinakaulo, pero napakatagal daw lumabas ng budget, kaya siya na muna ang mag-aabono.
“Natural, naniniwala naman sa kanya ang mga kausap niya! Agad siyang pinauutang na babayaran din daw niya agad kapag lumabas na ang budget para sa lugar nila.
“Ang masakit lang, e, matagal na palang lumabas ang budget para sa project na ipinagagawa kuno niya, pero hindi niya naman bi-nabayaran ang mga pinagkakautangan niya!
“Natunaw na niya ang datung, kung saan niya ‘yun dinala, e, siya lang ang nakakaalam, pero hanggang ngayon, e, utang pa rin!” simulang kuwento ng a-ming impormante.
Ang grupo ng mister ng isang female personality ay pinagkakautangan din ng actor-politician.
Hiyang-hiya ang asawa ng aktres sa kanyang mga kaibigan dahil ito ang naging daan para pautangin ng kanyang grupo ang male personality.
“Yayamanin ang husband ng female personality, may grupo siyang super-yaman din, kaya nu’ng lumapit sa kanya si actor-politician, e, sinamahan pa niya sa pangungutang.
“Pero pagkatapos niyang makuha ang datung, e, ni hindi na niya kinumusta man lang ang husband ng aktres. Deadma na siya, tinatawagan siya ng mister ng female personality, pero talagang pipi at bingi na siya.
“Naku, Bradly Guevarra at Tita Nene Ulanday, bitbit pa naman niya ang sikat na sikat na pangalan ng mga pulitiko! Para kasi siyang butiki na kapit nang kapit sa pader, kaya ayun, nu’ng lumagpak siya, e, pagkadiin-diin!” pagtatapos ng aming source.