ARESTADO ang company driver ng ABS-CBN 2 matapos umanong mahulog ang pouch nito na may lamang shabu sa Quezon City.
Si Eric Dato, ng PH15 Tower A Victoria Tower, Panay Ave., Brgy. South Triangle, sinampahan na ng kaso ng Kamuning Police.
Noong Marso 29 ng hapon ay pumunta umano si Dato sa isang restaurant sa Eugenio Lopez St. kanto ng Tomas Morato Ave., Brgy. South Triangle.
Nahulog umano ni Dato ang isang itim na pouch. Nakita ito ng isang crew ng restaurant at ibinigay sa kanyang manager.
Binuksan ang pouch upang maghanap ng pagkakakilanlan ng may-ari nito at dito nakita ang tatlong sachet ng shabu, dalawang plastic straws at gunting. Humingi ng tulong sa barangay ang restaurant.
Bumalik umano si Dato at hinahanap ang pouch kaya siya ay inaresto. Sa dala nitong sling bag ay may nakuha umanong dalawang tableta ng ecstasy, isang tableta na hindi batid kung ano, cellphone, burner, P640 pera at drug paraphernalia.