SINIGURO ng GMA Artist Center na naka-monitor sila sa kasong kinasasangkutan ngayon ng Kapuso young actor na si Migo Adecer.
Naglabas na ng official statement ang GMA Network tungkol sa pagkaaresto at pagkakulong ng binata sa Makati City kagabi matapos akusahan ng hit and run ng mga otoridad.
Nakikipag-coordinate na rin ang talent management ni Migo sa legal counsel nitong si Atty. Marie Glen Abraham-Garduque para sa development ng kaso.
Narito ang kabuuang pahayag ng GMA Artist Center sa pamamagitan ni Angel Javier, Corporate Communications head ng GMA Network.
“GMA Artist Center is closely monitoring the incident involving Migo Adecer.
“He is willing to assist the two people injured and his lawyer is now coordinating with them.
“We defer to Migo’s lawyer to address all legal matters regarding this incident.”
Ngayong araw sasailalim sa inquest procedures si Migo matapos kasuhan ng Makati City Police ng “reckless imprudence resulting to serious physical injuries and damage to government property at disobedience to person in authority.”
Ayon sa ulat, kagabi inaresto ng mga pulis si Migo matapos umanong mabangga at takbuhan ang dalawang tauhan ng Metropolitan Manila Development Authority sa kahabaan ng J.P Rizal sa Makati.
Pero ipinagdiinan ni Migo na hindi niya alam na may nabangga siya kaya hindi siya tumigil sa pagmamaneho.
Ayon naman sa mga arresting police officer, lasing umano ang aktor kaya malakas ang loob nitong makipaghabulan sa otoridad.
Iniimbestihan na rin kung totoong fake ang driver’s license na isinurender ni Migo sa mga pulis.