NAG-TRENDING sa social media at talagang pinag-usapan ng mga manonood ang pagkamatay ni Gardo Versoza sa GMA Telebabad series na Onanay.
Bumuhos ang emosyon sa nasabing episode ng serye matapos ang madamdaming eksena ni Gardo bilang si Dante. Pinatay na nga ang kanyang karakter sa Onanay matapos sugurin si Helena (Cherie Gil) para paaminin ito sa ginawang pagkidnap sa anak ni Onay (Jo Berry) na si Maila (Mikee Quintos).
Kahit si Gardo ay naging emosyonal matapos mapanood ang pagkamatay ni Dante. At sa pamamaalam niya sa nasabing teleserye, nag-post ang aktor sa kanyang Instagram account para magpasalamat sa lahat ng sumuporta sa Onanay at sa lahat ng nakiramay sa pagkamatay ni Dante.
Ipinost niya sa IG ang litrato kung saan nakahiga siya sa loob ng kabaong na may caption na: “Maraming salamat po PANGINOON sa paggabay nyo po sa aking pagganap sa katauhan ni DANTE.”
“Salamat po cupcakes sa lahat ng nagmahal kay lolo Dante, mamimiss ko ang kakulitan ng karakter nya,” dugtong pa niya.