ANO kayang mangyayari sa career ng isang actress-dancer kung tuluyan na siyang mawalan ng projects sa network kung saan siya kunektado?
Madalang pa sa patak ng ulan ang proyekto ngayon ng nasabing so-so actress cum dancer at dahil bago pa lang kaya sigurado kaming super liit ng kanyang talent fee at baka nga kulang pa ito sa pang-araw-araw niyang gastos.
Nagtanung-tanong kami kung ano ang pinagkakaabalahan niya ngayon, “Waley nga. Kung saan-saan na namin sinasaksak na show pero tinatanggihan siya. Kulang daw kasi sa acting, tapos ‘yung personalidad hindi akma sa edad kaya nahihirapan kaming ihanap siya ng babagay na role,” sabi ng taong tumutulong sa kanya.
Taga-malayong probinsya ang actress-dancer at dahil hilig talagang mag-artista kaya pinayagang lumuwas ng Maynila ng magulang at dahil marami siyang raket noon, lumuwas na rin ang pamilya at dito na sila nanirahan. Umupa pa ng condo unit na malapit din sa network kung saan siya nagtatrabaho.
Ang problema dahil sa walang regular na trabaho o pinagkakakitaan, anong mangyayari kay so-so actress cum dancer na balitang problemado ngayon dahil kinakapos sa pambayad ng renta ng bahay, kuryente at tubig. Idagdag pa ang pang-araw-araw na gastos sa pagkain nilang pamilya.
Naaawa kami sa kanya kaya ang sabi namin, kung sa tingin niya ay walang mangyayari sa kanya sa showbiz, mag-iba na lang siya ng trabaho, ‘yung regular o may monthly siyang suweldo para may pambayad siya sa mga bills.
Kaysa naman bumalik siya sa probinsya nila? Sabagay, may bahay naman sila roon, yun lang parang mahirap na sa dalaga na maging probinsyana ulit dahil natikman na niya ang buhay-showbiz.
Tinanong namin sa aming source kung may boyfriend ang so-so actress cum dancer, “Wala, uunahin pa ba niya ‘yun ngayon?”