ELISSE JOSON AT MCCOY DE LEON
“Sayang naman ‘yung movie ng McLisse. Bakit kaya hindi na kinagat ang loveteam nila?” Ito ang tsika ng nakausap naming movie producer tungkol sa naging resulta sa takilya ng pelikulang “Sakaling Maging Tayo” nina Elisse Joson at McCoy de Leon.
Dagdag pa ng kausap namin, “Bakit kasi kung kailan hiwalay na saka ipinalabas, siyempre hindi na kikiligin ang mga fans.”
Ang pagkakaalam namin ay inabutan ng paghihiwalay ang pelikula nina McCoy at Elisse dahil dati naman ay okay sila, sino ba naman kasing mag-aakalang maghihiwalay sila, e, halos langgamin na sila noon sa sobrang ka-sweetan.
Saksi rin kami kung paano magtilian ang kanilang supporters kapag nakikita silang magkasama at trending din sila lagi sa social media. Kaya ang tanong nga naman ng lahat, anyare?
Pero sa kabila nga nito, naging professional naman ang McLisse dahil tinapos pa rin nila ang pelikula nila at sabay ding nag-promote, ‘yun nga lang hindi na sila sweet.
Anyway, naobserbahan naming mukhang mas maganda yatang naghiwalay ang McLisse dahil ang dami nilang solo projects, lalo na si McCoy na bibida sa mini-series na Project Feb 14 sa digital flatporm ng ABS-CBN mula as Dreamcape Digital kasama sina JC Santos at Jane Oneiza na isinulat at idinirek ni Jason Paul Laxamana.
Bukod dito, bida rin si McCoy sa bagong season ng Wansapanataym. At si Elisse naman na katatapos lang lumabas sa seryeng Ngayon At Kailanman nina Julia Barretto at Joshua Garcia ay may mga nakalinya na ring proyekto sa ABS-CBN.