WILLIE REVILLAME
Nakaabang pa rin ang mga kababayan natin sa magiging desisyon ni Willie Revillame hanggang bukas, November 29, ang huling araw kung saan puwede pang lumahok sa halalan sa susunod na taon ang mga hindi nakapag-file ng COC sa takdang panahon.
Laman pa rin ng mga balita na tatakbong mayor ng Quezon City ang aktor-TV host, ‘yun ang senaryong kalat na kalat sa siyudad, hanggang hindi natatapos ang panahon ng substitution bukas ay nakaabang pa rin ang lahat.
Wala pang naging pag-uusap sa pagitan ni Willie at ng GMA 7, pinabubulaanan ‘yun ng sikat na personalidad, sa halip ay nag-renew pa nga siya ng kontrata para sa Wowowin.
Napakaraming lumalapit na pulitiko kay Willie na nangangako nang isandaang porsiyento ng pagsuporta oras na tinanggap niya ang pagtakbong mayor ng Quezon City.
Pinakikinggan lang ni Willie ang mga sinasabi ng mga kausap niya, wala pa siyang desisyon, kung totoong
tatakbo nga siya ay biglang magbabago ang mundo ng mahal na TV host ng bayan.
Nakaabang ang lahat. Baka raw kasi biglang magdeklara ng pagtakbo si Willie Revillame. Baka ‘yun ang nakaguhit sa kanyang palad.
“Imagine, nakahandang bumaba ang mga nagdeklara nang tatakbo para lang makuha nila si Willie? Magba-vice-mayor na lang sila, si Willie ang pinakaulo,” sabi pa ng isang nakausap naming malapit sa aktor-TV host.