ANIM katao ang napatay nang mauwi sa barilan ang buy-bust operation sa Rodriguez, Rizal, Martes ng umaga, ayon sa pulisya.
Dalawa sa mga napatay ay nakilala sa mga alyas na “Henry” at “Atan,” habang inaalam pa ang pagkakakilanlan ng apat, sabi ni Senior Supt. Lou Evangelista, direktor ng Rizal provincial police.
Pawang mga kasapi umano ng Waray-Waray group ang anim, at si “Henry” ang tumayo bilang kanilang pinuno, ani Evangelista.
Pinaniniwalaang sangkot sila sa gun-for-hire, carnapping, pagnanakaw, at mga aktibidad na may kinalaman sa iligal na droga sa Rizal at mga kalapit na bahagi ng Metro Manila, aniya.
Isinagawa ng mga miyembro ng Provincial Intelligence Branch at Drug Enforcement Unit ang operasyon sa Double L, Brgy. San Isidro, dakong alas-8:15.
Nakuhaan ng mga operatiba ang mga suspek ng isang kalibre-.45 pistola, kal.-.40 pistola, kal.-.9mm pistola, tatlong kal.-.38 revolver, isang granada, at 70 sachet na may 50 gramo o P100,000 halaga ng hinihinalang shabu, ani Evangelista.