IPINAMALAS ng Letran Knights ang matinding determinasyon na magwagi matapos malusutan ang Lyceum of the Philippines University Pirates, 80-79, sa kanilang NCAA Season 94 men’s basketball game Biyernes sa Filoil Flying V Centre, San Juan City.
Bumida para sa Knights si Bong Quinto na kinamada ang 10 sa kanyang 20 puntos sa ikaapat na yugto para ihatid ang kanyang koponan sa ika-11 panalo sa 15 laro.
May pagkakataon sana ang Lyceum na dalhin ang laro sa overtime subalit hindi iniskor na 3-pointer ang jumper ni Jaycee Marcelino sa huling 40.8 segundo ng ikaapat na yugto.
Nakatuwang naman ni Quinto sina Larry Muyang na gumawa ng 23 puntos at 16 rebound at JP Calvo na nagdagdag ng 18 puntos.
Gumawa si Mike Nzeusseu ng 25 puntos at 10 rebound para pangunahan ang Pirates na nahulog sa ikalawang puwesto sa hawak na 13-2 kartada. Nag-ambag naman si CJ Perez ng 16 puntos para sa Lyceum.