ILANG gabi na naming napapanood sa Ang Probinsyano ang magaling na child actress na si Rhed Bustamante. Natupad ang hiling ng marami nating kababayan na sana’y makarating kay Coco Martin ang kahirapang pinagdadaanan ng pamilya ng batang aktres.
Linggo nang gabi ipinalabas ang kuwento ng buhay ngayon ni Rhed at ng kanyang pamilya sa Rated K, kinabukasan mismo ay pinatawagan na ng magaling na action star ang bata, pagkatapos nang tatlong araw ay nasa set na ng matagumpay na serye si Rhed Bustamante.
Napakaganda ng puso ni Coco Martin, tama lang na tawagin siyang FPJ ng kasalukuyang panahon dahil sa dami ng kanyang mga natutulungan sa industriya, itinuturing siyang ninong ng mga personalidad na nangulimlim na ang bituin.
Balon siya ng pag-asa ng mga artistang nangangailangan ng trabaho, siya ang nilalapitan ng kanyang mga kasamahang ipit na ipit sa usaping pinansiyal, kawangis nga niya ang namayapang Hari Ng Pelikulang Pilipino na si Fernando Poe, Jr..
Sabi nga ni kaibigang Shirley Kuan, ang namamahala sa kanyang mga endorsement, “‘Yun lang ang alam natin, paano pa ang ibang magagandang nagagawa niya na hindi na niya ipinagmamakaingay?
“Kaya naman buhos ang pagdating ng mga biyaya sa kanya, maganda ang puso ni Coco Martin, napakaganda,” papuri ng aming kaibigang manager.