MARVIN AGUSTIN AT ANG MGA ALAGANG ASO
Maraming nag-like at nag-share ng ipinost ni Marvin Agustin sa Twitter at Instagram ng litrato ng kanyang pitong aso na kasama niya sa loob ng sasakyan.
Caption niya sa photo: “In compliance with @MMDA single passenger policy… pwede ba yan???”
May koneksyon ang post ni Marvin sa mainit na isyu tungkol sa High Occupancy Vehicle (HOV) traffic scheme ng Metropolitan Manila Development Authority o ang pagbabawal ng driver-only cars sa EDSA.
Aprubado na ang HOV ng mga Metro Manila mayors na bumubuo ng Metro Manila Council (MMC) ng MMDA. Ito’y para mabawasan daw ang traffic sa Soutbound at Northbound lanes ng EDSA tuwing rush hours.
Nitong nakaraang Miyerkules nagsimula ang dry run ng HOV (hanggang Aug. 22). Magmumulta ng P1,000 ang mga lalabag dito. Sa unang araw ng dry run ay mahigit 3,000 motorista ang nahuli ng mga traffic enforcer.
Sinagot naman si Marvin ng MMDA ng, “Hindi po. #mmda.”
Tugon naman ng Kapuso actor, “Okay po… mga ‘SINGLE’ isip na ulit tayo ng ibang paraan… kailangan na natin maging double!!!”
Kung matatandaan, naging mainit na usapan sa social media ang isyu sa HOV, may mga kumontra rito pero marami rin ang sumang-ayon.
Hugot naman ng mga single, unfair naman daw sa mga tulad nila ang bagong traffic scheme ng MMDA na siya ring hugot ni Marvin at ng iba pang celebrities na walang mga dyowa. – EAS