INIHAIN sa Kamara de Representantes ang panukala na bigyan ng Philippine citizenship si Justin Donta Brownlee, ang import ng Ginebra Gin Kings, upang maging miyembro ito ng Philippine basketball team.
Inihain nina 1Pacman Representatives Michael Romero, Enrico Pineda, Bohol Rep. Aristotle Aumentado at Masbate Rep. Scott Lanete ang House bill 8106.
“He has brought enormous pride and joy to the Philippine Basketball Association, as well as to all basketball enthusiasts in the country. Justin Brownlee said he can have a house here just like Norman Black or other imports who have fallen in love with the Filipinos and the Philippines,” saad ng panukala.
Si Brownlee ay unang naglaro sa PBA noong 2016 PBA Governor’s Cup at napagkampeon ang Barangay Ginebra. Nagkampeon muli ang Ginebra kasama si Brownlee noong 2017 Governor’s Cup at sa katatapos na Commissioner’s Cup kung saan siya ang itinanghal na Best Import.
Si Brownlee ay ipinanganak noong Abril 23, 1988 sa Georgia, United States of America.
“With very decorated and illustrious career, he wishes to play for the Philippine National team, he also wants the Philippines to be his permanent home.”
Kung maisasabatas ang panukala ay agad na mabibigyan ng Philippine citizenship si Brownlee kapag nanumpa na siya ng katapatan sa bansa.