ALDEN RICHARDS
MUKHA namang handang-handa na ang tropa ng Victor Magtanggol sa pagsisimula nito sa darating na Lunes at sa posibleng tapatan nina Alden Richards at Coco Martin ng Ang Probinsyano.
“Ganu’n ang industriya natin at ang audience naman ang may last say. Basta kami, we are offering you the kind of show na gusto ninyo at tiyak na kagigiliwan ninyong panoorin,” sey ng direktor ng bagong fantaserye ng GMA na si Dominic Zapata na masasabing beterano na rin sa mga action-fantasy series.
Positibo ang VM team na meron silang sariling audience na tututok at susuporta sa kanilang programa.
Dagdag pa nga ni direk Dominic, sanay na siya sa lahat ng klase ng kumpetisyon kaya’t ang mas lalong pagpapaganda ng kanilang proyekto ang lagi niyang tinututukan.
Confident din si Direk na very soon ay tatawagin ding “action hero” ang bida nilang si Alden Richards.
Mula nga sa mga nahawakan na niyang primetime kings and princes ng GMA 7, hindi raw nagkamali ang Kapuso Network na ibigay ang Victor Magtanggol role kay Alden.
Magsisimula nang umere ang bagong action-fantasy series na ibinase sa Norse Mythology, ngayong July 30 sa GMA Telebabad.
Bukod kay Alden, kasama rin sa cast sina Coney Reyes, Freddie Webb, Eric Quizon, Maritoni Fernandez, Al Tantay, Chynna Ortaleza, Miguel Faustmann at sina Pancho Magno, Andrea Torres, Kristoffer Martin, Janine Gutierrez at marami pang iba.
Speaking of Alden, taglay pa rin ng mahal naming Kapuso star ang pagiging maalaga at maalalahanin sa kanyang mga kaibigan sa media. Talagang lahat ay kanyang nilapitan at pinasalamatan gaya ng nakagawian na niya noong nagsisimula pa lang siya.
Never siyang nagpakita na siya’y tensed o pressured sa haharaping kumpetisyon dahil aniya, “Alam ko pong magkakaroon talaga ng mga isyu kahit anong gawin natin. Siguro, yung mag-level up at gawing kakaiba ang series namin, doon na lang kami magpo-focus para na rin sa ating mga viewers.”
Kaya naman kahit na-bash kami ng ilang followers namin sa social media nang sunod-sunod kaming mag-post ng mga nangyayari sa media conference ng Victor Magtanggol last Monday evening, ay dedma lang kami.
Wala kaming dapat na ipaliwanag kung bakit kami nasa bakuran ng GMA 7 at sumusuporta hindi lang kay Alden, kundi maging sa ibang close friends namin na kasama sa series gaya nina John Estrada at Freddie Webb.
Hay, ganyan talaga ang buhay. Ha-hahahaha!