WILLIE REVILLAME
TAHIMIK ang lovelife ni Willie Revillame. Walang nakikitang special girl maging ang kanyang staff na isinasama ang sikat na aktor-TV host sa studio ng Wowowin.
Madaling malaman kapag may girlfriend si Willie, kasama niya ang babae sa kanyang rehearsal, sa mismong show, kahit saan, kailangang inspirado siya sa pagtatrabaho.
Napagod na nga ba sa pakikipagrelasyon si Willie? Kung paanong para lang siyang nagbibihis nu’n sa pagpapalit ng girlfriend ay ganu’n naman siya katahimik ngayon.
Sabi ng isang common friend namin ni Willie, “Siguro, pangmatagalan na ang hinahanap niya ngayon, hindi na basta girlfriend lang, ‘yung makakasama na niya nang habambuhay.
“Aba, nakakapagod ding maging playboy, a? Sa una, e, masaya ang ganu’n, pero sa katagalan, e, maiisip mo rin na isang babae nang makakasama mo nang matagalan ang hahanapin mo.
“Parang ganu’n na si Willie ngayon. Kung karelasyon lang ang hanap niya, e, napapaligiran siya ng magaganda at seksing girls, pero wala na sa kanya ang ganu’n ngayon,” komento ng aming kaibigan.
Ang pinaghuhugutan na ng kaligayahan ni Willie Revillame ay ang mga kababayan nating kapuspalad na natutulungan niyang magkaroon ng panibagong buhay dahil sa Wowowin.
“Masaya akong umuuwi kapag may nananalo ng jackpot sa show, ‘yun ang happiness para sa akin, ang maging instrument ako sa pagkakaroon nila ng magandang buhay,” madalas sabihin ng aktor-TV host.