Mariing pinabulaanan ni Ara Mina na ikinasal na sila ng dyowang si Bulacan Mayor Patrick Meneses sa ibang bansa at sila’y nakatira na ngayon sa iisang bubong.
Ayon sa mga chika, nang pumunta raw sila ng politiko sa Malaysia ay nagdesisyon na silang magpakasal. Sey ni Ara, hindi raw nila itatago ang ganu’ng klase ng okasyon sa mga taong sumusuporta sa kanila.
“Natatawa nga ako, ano ba ‘yan! Kung meron namang magaganap na ano (kasalan), bakit di ko ipaaalam, di ba? Bakit pa isi-secret?” pahayag ni Ara sa interview ng programang Ang Latest ng TV5.
Wala pang proposal sa kanya, “So, huwag natin madaliin, may mga bagay pang kailangang asikasuhin. Huwag natin siyang pangunahan, baka napi-pressure tuloy yung tao sa inyo.”
Totoong napag-uusapan na nila ang kasal pero, “May inaano pa kaming mga bagay-bagay, pero napapag-usapan naman namin. Pero may isa pa raw test na hindi pa raw ako pumapasa. Ha-hahaha! Joke!”
Sana raw ay sila na nga ang magkatuluyan sa huli, “I guess so, bagay naman siguro kami. Sana siya na para tahimik na ang lola!”