PAGKATAPOS nang mahabang panahon ay balik-trabaho na si Mariel Rodriguez. Inuna lang muna niyang alagaan-palakihin ang kanilang anak ni Robin Padilla bago siya sumalang uli sa telebisyon.
Magandang karagdagan sa It’s Showtime si Mariel, nahasa na siya nang husto bilang co-host nu’n ni Willie Revillame, kayang makipagsabayan ng TV host kina Vice Ganda, Anne Curtis at iba pang mga hosts ng noontime show.
Wala rin siyang kapaguran, buhay na buhay siyang mag-host, magaling ding makipagsabayan sa mga biruan at tuksuhan si Mariel.
Kahanga-hanga si Mariel dahil isinakripisyo niya ang kanyang career para personal na alagaan ang kanilang anak ni Robin. Masuwerteng bata dahil ang mga unang panahon ng buhay nito ay mismong ina ang nag-alaga sa kanya.
Ang ibang personalidad na nanganak ay hindi na halos nagpahinga, ipinaubaya na lang sa yaya ang pag-aalaga sa kanilang mga anak, ‘yun ang pinanindigan ni Mariel nang ipanganak niya si Isabella. Siya mismo ang kailangang magsakripisyo sa pagpapalaki sa kanyang anak.
Mas masaya pa ngayon ang noontime show ng ABS-CBN, may kabatuhan na ng mga jokes si Vice Ganda, may karelyebo na si Anne Curtis kapag may trabaho ito sa ibang bansa.
Maligayang pagbabalik, Mariel!