KATHRYN BERNARDO
Ngayong Sabado na gaganapin ang inagurasyon ng pinakabagong branch ng KathNails ng pamilya ng magaling na young actress na si Kathryn Bernardo sa Robinson’s Place-Manila.
Ito rin ang unang-taong anibersaryo ng pinakauna nilang sangay sa SM North, kaya dobleng selebrasyon ang magaganap na inaasahang dadaluhan din ng ka-loveteam sa harap at likod ng mga camera ni Kathryn, si Daniel Padilla.
Napakabilis ng tagumpay ng KathNails, ibang-iba ang negosyong personal na pinamamahalaan ng mismong may-ari, si Mommy Min ang palaging nag-iikot-namamahala sa unang dalawang sangay ng kanilang negosyo sa SM North at sa Ayala Malls sa Balintawak.
Pagkatapos ng kanilang branch na bubuksan na ngayong araw na ito sa Robinson’s Place-Manila ay isusunod na agad ng pamilya ang paghahanda para sa kanilang branches sa SM Megamall, SM South Mall at SM Faiview.
Hindi lang basta pagnenegosyo ang layunin ng pamilya ni Kathryn nang itayo nila ang KathNails, isang paraan din ito para makatulong sila sa mga tagasuporta ng young actress na nangangailangan ng trabaho, libre ang mga seminar na dinadala pa nila sa iba’t ibang probinsiya.
May kakambal na puso ang business ng pamilya ni Kathryn Bernardo, kaya naman padagdag nang padagdag ang kanilang mga sangay, matindi ang suportang ibinibigay ng ating mga kababayan sa KathNails tagahanga man sila o hindi ng magandang young actress.