4 bata, 2 pa patay sa sunog sa Parañaque City

ANIM na miyembro ng pamilya, kabilang ang apat na bata, ang nasawi at dalawa pa ang nasugatan nang masunog ang isang apartment sa Parañaque City, Miyerkules ng gabi.

Nasawi sina Marie Joy de Jesus, 28, mga anak niyang sina Jomarie, 7, at Daniel, 9; pinsan niyang si Ana Donna Agrasada, 23; at mga anak nitong nakilala sa mga palayaw na Lon-lon, 6, at Don-don, 3, ayon sa ulat ng Southern Police District.

Sugatan naman sina Abegail Calderon, 9, at Judy Bulaklak, 56.

Nagsimula ang sunog sa apartment, na nasa Quirino ave., Brgy. Tambo, dakong alas-6.

Umabot ang apoy sa third alarm bago naideklarang “under control” alas-8:14 at tuluyang naapula alas-9:45.

Natagpuan ng mga bumbero ang mga bangkay ng anim na nasawi nang mag-clearing operation sa 3-palapag na gusali, ayon sa pulisya.

Bukod sa mga nasawi’t nasugatan, nagdulot ang sunog ng di bababa sa P50,000 halaga ng pinsala sa mga ari-arian.

Inaalam pa ang sanhi ng apoy, bagamat tinitingnan ang posibilidad na dulot ito ng paglalaro ng posporo ng mga bata. (John Roson)