MARICEL SORIANO
SA panahong ito na halos lahat ng mga artista ay nakadukdok na sa harap ng makina dahil sa pagkalulong sa social media, sa mga panahong ganito na ibinabalandra na ng mga artista sa publiko pati ang kung ano ang kinakain nila mula umaga hanggang hapunan, ay kakaibang-kakaiba ang Diamond Star na si Maricel Soriano.
Gumigising siya at natutulog ng kanyang-kanya lang ang panahon niya. Wala siyang kaaway, walang namba-bash sa kanya, dahil kahit isang social media account ay wala siya.
Kaya niya namang gawin ‘yun, mahusay siya sa mga games, pero ang ibuyangyang ang kanyang personal na buhay sa publiko ay hindi niya ginagawa.
Sabi ni Marya, “Naku, ayokong makipag-away sa mga taong hindi ko personal na kilala, no! Mas gusto ko ang laban na harapan, ayokong makipag-away sa mga taong nu’n ko lang naengkuwentro ang name!
“Sa edad ko ba namang ito, e, maghahanap pa ako ng kaaway? Wala akong kahit anong social media account, choice ko ito!” parang pataray na komento ng nag-iisang Diamond Star.
May patikim na handog si Maricel Soriano sa pelikulang “My 2 Mommies”, tita siya ni Paolo Ballesteros sa pinamahalaang proyekto ng kanyang bestfriend na si Direk Eric Quizon, mula sa produksiyong pinakamamahal niya na hindi niya maaaring tanggihan at talikuran.
“Si Mother Lily ba, mahihindian ko? No! Never! Afraid!” nakakaaliw pang bitiw ng magaling na aktres.