SUV vs. trike: 3 patay, 4 sugatan

Tatlo katao ang nasawi at apat pa ang nasugatan nang masalpok ng sports utility vehicle ang sinakyan nilang tricycle sa Bacolod City, Huwebes ng madaling-araw.

Dead on the spot ang mga sakay ng tricycle na sina Erlinda Villar at Melinda Tesoro, habang dead on arrival sa ospital si Rodelyn Nacis, sabi ni Senior Insp. Armilyn Vargas, tagapagsalita ng city police.

Sugatan ang tricycle driver na si Elvis Barcenas, 33, at iba pa niyang sakay na sina Geralyn Villar, Merlinda Barcenas, at Erica Tesoro.

Naganap ang insidente sa Malaspina st., North Drive, Brgy. Villamonte, dakong alas-12:50.

Minamaneho ni Barcenas ang tricycle mula hilaga, patungong timog, nang masalpok ng kasalubong na Ford Ecosport na dala ni Luigi Malacon, 28, ani Vargas.

Lumabas sa inisyal na imbestigasyon na lumipat sa kabilang lane ang SUV, ayon sa pulisya.

Nakaditine ngayon sa City Police Station 4 si Malacon, na residente ng bayan ng E.B. Magalona, Negros Occidental, ani Vargas.