ISANG original web series tungkol sa millennials mula sa award-winning director na si Pam Reyes ang matutunghayan sa iWant TV simula ngayong April 11.
Pinamagatang #Adulting, ito’y isang light drama-comedy tungkol sa apat na babaeng kaga-graduate lang sa kolehiyo at kanilang pakikipagsapalaran sa mundo ng adulthood.
Creative producer ng award-winning movie na “Birdshot” ang dirketor nito na si Pam Reyes. “Ang masalimuot at masayang buhay ng babae sa Maynila ang mapapanood sa #Adulting”, ani Pam.
Dagdag pa ng direktor, “Matagal ko nang gustong lumikha ng shows tungkol sa pagiging babae sa Pili-pinas. Kakaibang pagtalakay ito sa pagiging babae at sana magustuhan ng audiences. Karamihan sa team namin na lumikha nito ay halos puro kababaihan.
“Sinulat ko ang apat na karakter dito kasama si Rae Red, na naging kasama ko sa U.P. noong kolehiyo pa kami. Inpsired real life events ang mga sitwasyon sa #Adulting,” aniya pa.
Ang main character na si Aira ay isang Film graduate na nangangarap maging direktor, ngunit kailangan niyang pagdaanan ang pagiging isang production assistant. Mara-ming inside jokes tungkol sa industriya ang manggagaling kay Aira.
Si Lars naman ang “ate” ng grupo. Galing ito sa isang long-term relationship. Hinaharap niya ang paggawa ng mahirap na desisyong piliin kung ang pangarap niya sa buhay o ang kanyang love life ang dapat kanyang unahin.
Si Sab naman ay isang “conyo,” ngunit madilim na personal at mental issue ang kanyang linalabanan. Ang Public Administration graduate naman na si Bulak ay isang promdi. Paghahanap naman ng magandang trabaho ang kanyang kailangang pagtuunan ng pansin ngunit sa gitna nito ay makikipagbuno ito sa kanyang sexual identity.
Ang Adulting ay ang term gamit ng millennials ngayon kapag pinag-uusapan ang pagganap ng kanilang mga responsibilidad bilang adult.
Ang pagsabak sa digital shows ay paraan ng ABS-CBN upang maging isang digital company. Ito ang Filipino company na may pinakamalaking online presence at ang top Youtube and Facebook publisher sa Pilipinas. Nangunguna ito sa dami ng views online sa bansa, at ika-32 naman sa buong mundo.
Panoorin ang tatlong episode ng #Adulting sa Miyerkules, April 11 nang libre sa iWant TV. Ang iWant TV shows ay mapapanood sa website na www.iWantv.com.ph at sa pamamagitan ng iWant TV app na maddownload mula sa App Store o Google Play.