Saksakan sa mall isa patay

PATAY ang isang lalaki na sinaksak sa loob ng SM North-EDSA sa Quezon City kahapon.
Namatay habang isinusugod sa Sioson Hospital ang biktimang si Geraldo Lopez.
Isang police manhunt ang inilungsad laban sa suspek na si Leo Laab, supervisor technician sa service center ng computer store sa loob ng mall.
Ayon sa pulisya, pumunta ang biktima sa service center upang kunin ang ipinagawa nitong laptop alas-5:30 ng hapon. Dinala doon ang laptop noong Marso 8.
Hindi naman ibinigay ang kanyang laptop dahil wala siyang dalang claim stub na nagresulta sa pagsasagutan ng suspek at biktima.
Umalis ang biktima samantalang ang suspek ay bumili umano ng kutsilyo sa isang tindahan sa mall at bumalik.
Nang bumalik ang biktima ay nagka-initan ang dalawa. Binato ng biktima ng plastic bottle ng mineral water ang suspek kaya sumugod ito hawak ang patalim.
Isang empleyado ng tindahan ang nagtangkang awatin ang suspek subalit hindi niya ito napigilan.