EJAY FALCON
HUMINGI na ng sorry si Ejay Falcon sa nakabanggaan ng kanyang driver kamakailan sa Pililia, Rizal. Aksidente raw ang nangyari at walang may gustong masaktan.
Sa report ng TV Patrol, sinabi ng Kapamilya actor na papunta siya ng taping nang maganap ang aksidente. Aniya, hindi naman daw inaantok ang kanyang driver, “Ako naniniwala na aksidente po talaga yung nangyari.”
Ayon daw kasi sa nakabanggaan nila na kinilalang si Raffy Reyes, tinakasan daw siya nina Ejay. Sabi ni Reyes, “Nakahinto po sila. Nu’ng ako naman ang papalapit sa kanila, saka namang takbo. Dun ako talagang sumama ang loob. Di ko tanggap yung iniwanan niya ako.”
Ito naman daw ang sabi ng driver ni Ejay, “Version naman ng driver ko bumaba siya ng sasakyan, pagbaba niya…may sumigaw. First time na nangyari (ito sa kanya), may sumigaw, nag-panic siya.”
Sa kabila nito, tanggap din ni Ejay ang pagkukulang nila kaya humingi na siya ng paumanhin sa nakabanggaan nila, “Humihingi po ako ng pasensiya kung nagkamali yung driver ko and kung may pagkukulang sa nangyari. Maraming salamat na lang po at walang nasaktan sa atin.”