KRIS AQUINO
POSITIBONG balita para sa mga tagasuporta ni Kris Aquino ang nalalapit na niyang paggawa ng pelikula. Pagpasok ng 2018 ay magiging abala na ang aktres-TV host sa paggiling ng mga camera para sa pagbibidahan niyang proyekto pagkatapos nang halos dalawang taon.
Kundi man naging mabait sa kanya ang kapalaran sa pagkakaroon ng show ay heto naman ang kanyang pambawi, magpoprodyus siya ng pelikula sa pagpasok ng susunod na taon, plantsado na ang kanyang mga plano.
Mahal na mahal ni Kris ang mundo ng lokal na aliwan, para siyang isda na inilipat sa lupa kapag nalayo ang bituka niya sa showbiz, hindi pa naman huli ang lahat dahil nandiyan pa rin ang kanyang mga tagahanga.
Patapos na ang 2017, pero ang pag-asa ni Kris na makabalik sa telebisyon ay nawalan ng saysay, nagpatulong na siya kay Willie Revillame para makapasok sa GMA 7 pero wala pa ring naganap.
Malay natin, hindi imposible, baka sa 2018 ay magbago na ang pagkakasalansan ng mga bituin sa buhay at career ni Kris Aquino. Kung ang kontrata ay may expiration date, ang mga problema at pagsubok ay ganu’n din, may katapusan.