Kathryn, Daniel nominado sa 2017 Blue Star Awards ng Vietnam

PANIBAGONG good news na naman ang natanggap ngayong araw ng tambalang KathNiel.

Parehong nakakuha ng nominasyon sina Daniel Padilla at Kathryn Bernardo sa Blue Star Awards ng Vietnam.

Makikipaglaban si Kathryn sa Best Foreign Actress category kung saan nominado rin sina Meg Imperial at Andrea Torres.

Si Daniel naman ay nominado sa Best Foreign Actor category. Makakalaban naman niya  rito sina JC de Vera at Mikael Daez, bukod pa sa mga foreign actors na nakakuha rin ng nominasyon.

Para sa Favorite Foreign Film category, nominado naman ang teleserye nina Kathryn at Daniel na Pangako Sa ‘Yo pati na rin ang Moon of Desire ng ABS-CBN at Sana Ay Ikaw Na Nga ng GMA 7.

Kung matatandaan, nagwagi rin sina Kathryn at Daniel bilang Best Foreign Actress and Best Foreign Actor para sa serye nilang Got To Believe sa Vietnam’s Face of the Year noong 2016.