KATHRYN BERNARDO
NANANATILING numero uno pa rin sa ratings game ang fantaseryeng La Luna Sangre lalo na ngayong nalaman na ng buong Moonchasers team kung sino talaga si Jacintha Magsaysay, ganu’n din ang La Liga Una.
Base sa datos ng Kantar Media, mas tinutukan ang Power Unlock week na nagsimula nitong Lunes at nakakuha ng national TV rating na 31.4% mula sa pinagsamang urban at rural homes.
Sa naturang episode, nasaksihan ng mga manonood ang pagsusumamo ni Malia (Kathryn Bernardo) sa buwan at paghiling niya na lumakas pa ang kanyang kapangyarihan para tuluyang matalo si Sandrino (Richard Gutierrez) at masagip si Tristan (Daniel Padilla). Tila narinig naman siya nito nang biglang pumula ang kanyang kamao.
Agad na nag-trending sa social media ang emosyonal na monologue ni Kathryn at umani ng samu’t saring papuri sa netizens. Nagkakaisa ang netizens sa pagsasabing deserving si Kathryn na magka-best actress award next year.
Huwag palampasin ang mas pinabagsik na La Luna Sangre pagkatapos ng FPJ’s Ang Probinsyano sa ABS-CBN.