MULA sa telebisyon, dadalhin naman nina McCoy de Leon at Elisse Joson ang kilig sa sariling musika sa kanilang paglulunsad ng “McLisse” album mula sa Star Pop sa inaabangang grand album launch na magaganap sa SM City North EDSA Skydome ngayong Linggo, 5 p.m..
Sina Elisse at McCoy na nga ang pinakabagong artists ng Star Pop, ang bagong sublabel ng Star Music para sa mga kabataan, at sila ay magsasama para haranahin ang mga manonood ng kanilang mga nakakalikig na awitin mula sa bagong album.
Kasunod ito ng matagumpay na release ng kanilang bersyon ng kantang “If We Fall In Love,” na isinulat ni RJ Jimenez at kanilang inilabas noong Hunyo. Ngayon kabilang na ang nasabing single sa kanilang pinakainaabangang album.
Bahagi rin nito ang bersyon nila ng “Opposites Attract” ni Jungee Marcelo, “Chinito” ni Jed Dumawal, “Para Lang Sa’yo” ni Jonathan Manalo, at “Yakap” ni George Canseco. Si Rox Santos ang nagsisilbing over-all album producer.
Abangan ang mga bida ng The Good Son na sina Elisse at McCoy sa grand album launch nila ngayong Linggo sa SM Skydome. Mabibili na ang “McLisse” album sa nasabing show o pwede ring i-download sa digital stores worldwide.