COCO MARTIN AT MAJA SALVADOR
TINANGHAL na Best TV Station ang ABS-CBN at umani ang TV network ng 22 awards para sa kanilang entertainment programs at personalities sa 3rd LionhearTV RAWR Awards, isang online award-giving body na kinabibilangan ng fans at readers, blogging community at industry leaders na kumikilala sa talento ng mga showbiz celebrities.
Nasungkit ng Primetime King na si Coco Martin ang Royal Lion Award, isa sa top awards pati na ang Actor of the Year, habang Magnanimous Lion of the Year awardee naman si Popstar Royalty Sarah Geronimo.
Kinilala rin ng blogging community ang ABS-CBN Corporate Communications bilang Blogger-Friendly Group, habang apat na awards naman ang napanalunan ng top-rating primetime series na Wildflower kabilang na ang Teleserye of the Year, Actress of the Year (Maja Salvador), Ultimate Bida (Maja Salvador), at Ultimate Kontrabida (Aiko Melendez).
Loveteam of the Year naman ang tambalan nina Maymay Entrata at Edward Barber at nasungkit din ni Maymay ang Breakthrough Artist of the Year.
Kabilang din sa mga Kapamilya stars na pinarangalan sa RAWR awards sina Darren Espanto (Favorite Performer of the Year), BoybandPH (Favorite Group) at Karla Estrada (Favorite TV Host).