ISABEL GRANADA
NGAYONG Biyernes nang umaga hanggang alas singko nang hapon ay maaari nang masilip ng ating mga kababayan ang mga labi ng yumaong magandang aktres na si Isabel Granada.
Pakiusap lang ng pamilya ng namayapang aktres na sana’y mabigyan sila ng pagkakataong makasama ang bangkay ni Isabel nang sila-sila lang sa gabi. Hanggang alas dose nang hatinggabi lang ang kanilang pakiusap sa mga nais sumilip sa huling pagkakataon sa bangkay ng aktres.
Nakalagak ang kanyang bangkay ngayon sa Sanctuario de San Jose sa Greenhills, hanggang sa Sabado nang gabi ang lamay (bukas), dahil sa Linggo nang umaga ay ililipat na ang kanyang mga labi sa Arlington Chapels para sa kanyang cremation nang makapananghali.
Bilang miyembro ng Philippine Air Force ay hinandugan si Isabel Granada ng pagpupugay ng kanyang mga kasamahan. Bukod sa pagiging lisensiyadong piloto ay sarhento rin siya ng PAF, AirWoman 2nd class si Isabel.
Nagkaroon ng vigil ang PAF sa kanyang lamay, sinalubong at ihahatid siya ng kanyang mga kasamahan hanggang sa huling hantungan, nakakapangilabot ang ibinigay na pagpapahalaga ng grupo para sa yumaong magiting nilang kasamahan.
At sa isang panahong halos wala sa sarili si Mommy Guwapa sa napakasakit na pangyayaring ito ay may mga kaibigan ang kanyang anak na nag-asikaso sa mga pangangailangan sa burol ng aktres.
Kapuri-puri sina Nadia Montenegro, Bianca Lapus at Chuckie Dreyfus sa sinserong pagtulong sa pamilya ni Isabel Granada.