NGAYON pa lang ay parang nahuhulaan na ng mas nakararami kung ano ang magiging kapalaran ng kinatawan ng ating bayan sa nalalapit na Miss International.
Mainit ang dugo ng mga kababayan natin kay Mariel de Leon, dahil du’n ay mukhang pagdadamutan siya ng suporta ng mga naiinis-nagagalit sa kanya, nakakalungkot ngang isipin na ang dami-daming nagwi-wish sa kanyang pagkatalo.
Ngayon lang nangyari ang ganito, palaging matinding suporta ang ibinibigay ng mga Pinoy sa mga nagiging kinatawan natin sa mga international beauty pageants, bukod-tanging kay Mariel de Leon lang nabaligtad ang senaryo.
Hanggang ngayon kasi ay naaalala pa rin ng mga kababayan natin ang pagiging palasawsaw niya sa maraming isyu, may katabilan ang bibig ng beauty queen, hindi pa ‘yun nakakalimutan ng kanyang mga bashers.
Isa sa maraming personalidad na tinatawag na patolah si Mariel de Leon. Kapag may napapanahong kontrobersiya, pang-showbiz man ‘yun o pampulitika, ay siguradong makikihalo si Mariel.
Tuloy ay maraming nagkokomento na malayung-malayo siya sa image ng kanyang mga magulang, sa tagal na nina Christopher de Leon at Sandy Andolong sa showbiz ay walang kinasangkutang negatibong isyu ang mag-asawa, malayung-malayo sa imaheng meron ngayon si Mariel.