KAILANGAN lang maghintay ni Aljur Abrenica para makuha nito ang loob ng kanyang biyenang hilaw na si Robin Padilla. Kilalang-kilala na ng showbiz ang kilatis ng ugali ng sikat na action star.
Ganyan lang siya sa una pero, kapag dumating na ang takdang panahon ay hindi niya makakayang tablahin ang kanyang anak, kapag si Kylie na ang nakipag-usap kay Robin ay siguradong matutunaw na ang puso ng action star.
Si Robin pa? Wala sa kanyang bokabularyo ang pagkikimkim ng galit sa puso, maaaring nagtatampo rin siya, pero ang pagtatago ng poot sa kanyang dibdib ay hindi kailanman naging ugali ni Binoe.
Mapagpatawad ang puso ni Robin, kahit sa mga taong nanakit ng kanyang damdamin ay nakapagpatawad siya, sa sarili pa kaya niyang anak magdadamot ang aktor?
Kailangan lang munang maghintay ni Aljur para matanggap ng ama ni Kylie ang kanilang relasyon.
May mga kailangan lang siguro silang kailangang mapag-usapan nang lalaki sa lalaki, meron lang silang dapat plantsahin bilang ama at karelasyon ni Kylie, pero siguradong darating din ang panahon na maiaayos ang lahat-lahat.