TILA napikon at nabwisit na rin si Anne Curtis sa mga bashers ng kanyang kaibigan at co-host sa It’s Showtime na si Nadine Lustre.
Hanggang ngayon kasi ay ayaw pa ring tantanan ng ilang netizens ang girlfriend ni James Reid tungkol sa pagpapakamatay ng kapatid nitong si Ice na nagbaril sa ulo sa loob ng kanyang kuwarto last week.
Binu-bully ng mga bashers si Nadine dahil sa mga ipinost nito sa kanyang social media accounts tungkol sa depression na naging sanhi nga ng maagang pagkamatay ng kanyang nakababatang kapatid.
Wala raw karapatang mag-advice ang dalaga sa mga kabataan tungkol sa depresyon ay suicide dahil hindi siya credible.
Sa isang Twitter post kung saan makikita ang litrato nina Nadine at Anne na magkasama na kuha sa 8th anniversary kick-off ng Showtime, may mga nag-comment ng masasakit ng salita.
Dito na hindi nakapagtimpi si Anne at niresbakan ang bashers ni Nadine. Aniya, “You are a horrible person. You never know what a person is going through or how they deal with whatever it is they are feeling. So back off!”
Nauna nang nagpayo si Nadine sa mga kabataan na huwag na huwag magpapatalo sa depresyon. Kailangan daw matutong lumaban ang bawat taong dumaranas nito kasama ang kanilang mga pamilya.