ALJUR ABRENICA
MARKADO ang magkabilang panga ni Aljur Abrenica sa mga eksena niya sa Ang Probinsyano. Kitang-kita ang pagngangalit ng kanyang mga panga sa mga tagpo kung saan siya nagagalit.
At mukhang binabantayan ng Dreamscape ang kanyang pagganap, napakalaki na ng ipinagbago ng acting ng binatang-amang aktor, parang hindi na siya kasali ngayon sa hanay ng mga tinatawag na hamonadong aktor.
Na dapat lang naman dahil kapag nagkaroon na sila ng engkuwentro ng bumibidang si Coco Martin ay lalamunin siya nang buung-buo ng napakanatural nitong pagganap kapag hindi siya nagpakitang-gilas.
Siyempre’y nakatutok sa serye ang mga kaibigan-anak-anakan naming becki. Sabi nga ni Sonia, ang interior designer naming kaibigan, “Hindi na ako nagpapaluto ng ulam sa dinner. Nagpapasaing na lang ako. Kasarap na ulam ni Aljur!”
Ha! Ha! Ha! Ha! Ang nagagawa nga naman ng katawang panlaban, ang nagagawa nga naman ng mga pandesal sa abs at braso na nagmumura sa laki, ‘yun ang inaabangan nila kay Aljur.
Mabilis ang takbo ng kuwento ng Ang Probinsyano. Malaktawan mo lang ang isang episode ay medyo maliligaw ka na, marami ka nang mapapalampas, kaya kailangan talagang tutukan ang istorya nito gabi-gabi.