DANIEL PADILLA AT KATHRYN BERNARDO
NANGHAHAWAK na ng leeg ng manonood ang seryeng La Luna Sangre na pinagbibidahan nina Daniel Padilla at Kathryn Bernardo. Wala pa ang kilig na hinihintay ng kanilang mga tagahanga pero nandiyan na ang sangkap na napakahalaga sa daloy ng istorya.
Nakakawiling manood ng serye dahil alam mong hindi dinadaya ng produksiyon ang mga eksena. Tama ang gayak ng mga artista, maayos ang implementasyon ng mga eksena, pinaghandaan talaga ng ABS-CBN ang seryeng ito.
Sa unang sultada pa lang naman kasi ng serye ay mga sikat na personalidad na ang nagbukas, matatawaran ba ang presensiya nina John Lloyd Cruz at Angel Locsin? Idagdag pa ang mortal nilang kalaban na si Richard Gutierrez?
Mahihiya ang ibang serye sa ganda ng La Luna Sangre. Ang kanilang mga special effects ay laganap, masinop na inedit ang mga eksenang nagliliparan at nagpapalit ng karakter ang kanilang mga artista, nakaka-proud panoorin ang seryeng ito.
Dapat lang palakpakan ang mga eksena ni Kathryn Bernardo, naglaan ng panahon ang young actress para bigyang-buhay ang papel ni Maliya, sa mga huling eksenang natutukan namin ay malapit na silang magkaroon ng mas maraming eksena ni Daniel Padilla.
At ang dami-daming artistang kilala na pinapatay gabi-gabi, hindi nanghihinayang ang produksiyon sa takbo ng pangyayari, sa ibang serye kasi ay babad na babad ang mga kilalang artista at hindi agad pinapatay.