MABUTI naman at marunong nang magrenda ng kanyang dila si Kris Aquino. Paminsan-minsan ay kumakawala pa rin ang kanyang kataklesahan, lumulutang pa rin ang kanyang kanaturalan, pero hanggang maaari ay siya na mismo ang rumerenda sa kanyang pagsasalita.
Ang kuwento ni Kris ay malapit na siyang magbalik sa mainstream television, ayaw lang daw niyang sabihin kung saang network, dahil baka kapag hindi na naman natuloy ang transaksiyon ay baka mapahiya lang siya.
Nu’n pa dapat ginawa ni Kris ang ganyan. Dapat ay nu’n pa niya naisip na mahirap magpakawala ng mga detalye lalo na kung wala pa namang kasiguruhan dahil ang siguradong magiging resulta nu’n ay ang pagkapahiya.
Mas maganda kapag nand’yan na ang proyekto, ang network at ang lahat ng mga detalyeng kailangan, magsalita man siya nang magsalita ay hindi na siya mapapahiya.
Marami nang nakaka-miss kay Kris. Tanggapin natin ang katotohanan na wala na siyang kailangang patunayan, nagkataon lang na hindi niya naging kakampi ang kapalaran nitong dalawang nakaraang taon.
Hindi aamagin ang talento na tulad ng kay Kris Aquino, hawak na niya ‘yun magpakailanman at wala nang makaaagaw, kaya kapag umayos na ang hilera ng kanyang mga bituin ay siguradong panalo ang kanyang pagbabalik.
Ang tanong na lang ay kung kailan ba ‘yun at kung saang network? Kinukuha ba siya ng GMA 7 o sa ABS-CBN pa rin siya mapapanood?
Abangan!!!!