BUKOD sa pagtuon sa korona ay asam din ng magkapatid na 2017 NCAA beach volley champion Rey at Relan Taneo na maging miyembro ng pambansang koponan sa paglahok nila sa 2017 Belo Philippine Superliga Beach Volleyball Challenge Cup umpisa ngayong umaga sa SM By the Bay.
Unang lalaro ang mga kalalakihan ganap na alas-8 ng umaga kung saan nakatutok din ang Larong Volleyball sa Pilipinas Inc. para sa mga posibleng maging miyembro ng bubuuing pambansang koponan.
“The LVPI is in the process of forming the national beach volley team and it will be good for our players, both in men and women’s, to show their talent and abilities for them to be a possible candidate to the national squad,” sabi ni Philippine Super Liga (PSL) president Ramon “Tatz” Suzara.
“Gusto po talaga namin na makapaglaro sa beach volley dahil dito po talaga kami naglalaro noon,” sabi ni Reylan, na mas nakakatanda sa tatlong magkakapatid na Taneo na ngayon ay kabilang sa koponan ng University of Perpetual Help Dalta System.
Inaasahan naman na hitik sa aksyon din ang women’s division sa pagpapareha ng mga kilalang manlalaro sa bansa tulad nina Bernadette Pons ng FEU at Cherry Ann Rondina ng UST para sa Petron Sprint 4T na inaasahang magbibigay ng matinding hamon sa mga dating La Salle players na sina Cyd Demecillo at Fritz Gallenero ng F2 Logistics A.
Unang maghaharap sa women’s division sina Marijo Medalla at Bianca Tripoli ng Perpetual at Generika Ayala B nina Rosalie Pepito at Kathleen Arado sa alas-3 ng hapon. Susundan ito nina Demecillo at Gallenero ng F2 Logistics A kontra Wensh Tiu at Abie Nuval ng Cocolife sa alas-4 ng hapon.
Haharapin naman nina Mylene Paat at Janine Marciano ng Cignal B ang powerhouse Generika-Ayala A nina Fiola Ceballos at Patty Orendain sa alas-5 ng hapon bago sisimulan ni Jovelyn Gonzaga ang pagtatanggol sa korona kasama ang bagong kapareha na si Maica Morada sa Cignal A sa pagsagupa sa Generika-Ayala B nina Rosalie Pepito at Kat Arado ganap na alas-7 ng gabi matapos ang laban nina Kathleen Barrinuevo at Cherilyn Sindayen ng Foton kontra Ces Molina at Bang Pineda ng Petron XCS.
Optimistiko naman si Gonzaga, na ilang beses tinanghal na kampeon at kinatawan ang bansa sa beach volleyball sa Southeast Asian Games sa Palembang, Indonesia noong 2011, na malalampasan nito ang matinding hamon kontra sa mga bagong karibal.
“Panibagong challenge dahil bagong kakampi at then everybody improved,” sabi ni Gonzaga, na kapareha si Nerizza Bautista ay nagawang masungkit ang titulo nakaraang taon. “I will try my best to play with extreme caution because everybody is out to win the title.”