SISING-ALIPIN ngayon ang isang kilalang male personality sa kanyang larangan. Maraming nanghihinayang sa lalaking ito dahil ang ganda-ganda na sana ng kartada ng kanyang karera pero nagpadala pa siya sa tawag ng laman.
Napakaraming babaeng nagpapapansin sa kanya, meron na siyang karelasyong kilalang personalidad din sa larangang hindi naiiba sa kanya, pero nagpatukso pa siya.
Maraming itinuturong kung sinu-sino ang male personality, kesyo may mga katropa lang daw na nang-iintriga at naiinggit sa kanya, pero lumabas din ang katotohanan.
Kuwento ng aming source , “Nakakapanghinayang si ____ (pangalan ng male personality), ang ganda-ganda na nga ng takbo ng career niya, e, sinabayan pa niya ‘yun ng kalokahan.
“Padenay-denay pa siya nu’ng una, takot na takot kasi siyang umamin dahil maraming multong naglaro sa utak niya. Una, paano na lang ang girl na umaasang habang malayo siya, e, tapat na tapat sa kanya ang guy?
“Kaso, hindi na pala niya kailangang lumayo, matagal na palang nakikipaglaro sa ibang babae ang boyfriend niya! Nakakahiya!” simulang kuwento ng aming impormante.
Nu’ng nakikipagkalas na sa kanya ang babae ay saka lang siya umamin. Hindi na niya sinisisi ang mga katropa niya, umamin na rin ang maelyang lalaki na madalas pala siyang gumagawa ng kalokohan sa internet, ‘yun pala ang dahilan kung bakit minsan ay palyado siya sa paglalaro.
“Paano namang hindi maaapektuhan ang career niya, e, kung ano pa ang bawal na bawal na gawin niya, ‘yun ang binababaran niya? Makipaglaro ba nang magdamag sa mga kababaihan? Ano ang inaasahan niya, lalakas ang katawan niya?”
“Naku, Bradly Guevarra at Tita Nene Ulanday, hindi n’yo na puwedeng i-keep ang kuwentong ito, kalat na kalat na, siguradong kilalang-kilala n’yo siya!” pagtatapos ng aming source.