NASINTENSIYAHAN ng pagkakakulong at multa ang mag-asawang Singaporean matapos gutumin ang Pinay na kasambahay.
Umabot ng tatlong linggong pagkakakulong at multang $10,000 (P359,000) ang ipinataw sa freelance trader na si Lim Choon Hong, 47. Tatlong buwang pagkakakulong din ang hatol sa misis na si Chong Sui Foon, 47.
Iaapela naman ng prosekusyon ang desisyon kung saan nais nilang ipataw ang isang taong pagkakabilanggo para sa dalawa.
Pansamantalang nakakalaya ang mag-asawa matapos magpiyansa ng $3,000 (P107,800) habang hinihintay ang apela.
Matatandaang napaulat na pinapakain lamang ng mag-asawa ang Pinay domestic worker na si Thelma Oyasan Gawidan ng dalawang beses kada araw sa kanilang dating tinitirhan na condominium sa Boulevard Residence sa Cuscaden Walk, dahilan para bumaba ang timbang ng 40-anyos sa 29 kilo mula sa 49 na kilo sa loob lamang ng 15 buwan.