Nangangarap magkaroon ng sariling lupa at bahay (2)

Sulat mula kay Ellen Lolomboy, Bocaue, Bulacan
Problema:
1. Seaman po ang mister ko habang ako naman ay isang public school teacher at may dalawa po kaming anak. Sa ngayon po ay nasa abroad ang mister ko kaya nag sisikap akong maka-ipon para kahit maliit lang ay magkaroon kami ng sariling lupa at bahay para hindi na ngungupahan.
2. Itatanong ko lang po kung matutupad kaya ang pangarap naming magkaroon ng sariling lupa at bahay at kung matutupad kailan po kaya ito mangyayari? January 14, 1983 ang birthday ng mister ko at June 28, 1984 naman ang birthday ko.
Umaasa,
Ellen ng Bulacan
Solusyon/Analysis:
Astrology:
Ang zodiac sign mong Cancer (Illustration 2.) ang nagsasabing ka-compatible mo ang iyong mister na isang Capricorn. Ibig sabihin dahil tugma at compatible naman kayong dalawa, sa pagtutulungan nyong mag-asawa, sa bandang huli kusa ding matutupad ang pangarap nyong magkaroon ng sariling bahay at lupa.
Numerology:
Ang birth date mong 28 at 14 naman ang mister mo ay nagsasabing, yayaman kayo sa pagnenegosyo na may kaugnayan sa butil at agricultural products, puwede ding tindahan o grocery, ganon din sa walang tigil na pagse-seaman ni mitser. At sa sandaling nakapagnegosyo na kayo, mas mabilis kayong makaka-ipon hanggang sa kusa ng matupad ang pangarap nyong sariling lupa at bahay at pagkatapos ay tuloy-tuloy pa kayong yayaman.
Luscher Color Test:
Upang mas madaling matupad ang pag-aanalisa sa itaas, lagi kayong gumamit ng kulay na dilaw, berde at pula. Sa nasabing kulay maraming magaganda at suwerteng kapalarang may kaugnayan sa materyal na bagay ang kusang darating upang sa bandang huli tulad ng nasabi na ay lalo pa kayong yumaman.
Huling payo at paalala:
Ellen ayon sa iyong mga datos, basta’t manatili ka lang na mag-ipon at magnegosyo ng mga kalakal na binanggit na sa itaas, tiyak ang magaganap, sa ayaw at sa gusto nyo, sa taong 2019 hanggang 2020 sa edad mong 35 pataas, makakabili na kayo ng lupa at sa nasabing panahon unti-unti na ring masisimulan ang inyong dream house.