Bus vs. trike; 3 patay, 1 malubha

Tatlo katao ang nasawi at isa ang malubhang nasugatan nang salpukin ng pampasaherong bus ang sinakyan nilang tricycle sa Sorsogon City kagabi.

Agad ikinasawi ng tricycle driver na si Patrick Lagonoy, 26, at mga sakay niyang sina Mark Tatel, 19, at Jerick Jasareno, 22, ang matinding pinsala sa iba-ibang bahagi ng katawan, sabi ni Supt. Nonito Marquez, tagapagsalita ng Sorsogon provincial police.

Isinugod naman ang pasahero ding si Christian Barbacena, 19, sa Sorsogon Provincial Hospital dahil sa pinsala sa ulo’t katawan.

Sinalpok ng Diamond Star bus (TYG-692) na bumibiyahe mula Samar patungong Maynila ang tricycle ni Lagonoy sa bahagi ng Maharlika Highway na malapit sa Red Palm Subdivision, Brgy. Pang Pang, ala-1:35.

Lumabas sa imbestigasyon na inokupa ng bus, na minaneho ni Antonio Leocadio, ang kabilang lane kaya nasalpok ang kasalubong na tricycle, ani Marquez. (John Roson)