Unsa ang sakto?

NASA 1.8 milyon ba o kapin 3 milyon ang mga drug users sa Pilipinas?
Si Presidente Duterte ang miingon nga kapin sa 3 million ang mga drug users sa atong nasod.
Niadtong Septembre, miingon pa siya nga ”happy to slaughter’ o malipayon siyang mopatay ug 3 ka milyon nga drug addicts, samtang iyang gikumparar ang iyang kaugalingon kang Adolf Hitler. Si Hitler ngilngig na gikaintapan nga mi-order sa pagpatay sa 11 million ka mga tawo sa mga death camps, apil na ang unom ka milyon nga mga Hudeo.
Pastilan! Nauyog na man gani ta sa kapin 3,000 nga drug-related nga pagpatay. Unsa na kaha sa 3 million.
Sa mga unang pagbungat ni Presidente nga kapin 3 million ka buok ang mga drug addicts, miingon siya nga base kini sa report sa Philippine Drug Enforcement Agency o PDEA.
Pero sa mga naunang annual report sa PDEA, giingon nga kapin ra sa usa ka million ang mga drug addicts. Ang source sa PDEA mao ang Dangerous Drug Board o DDB.
Ang DDB mao ang gahimo sa pagtuon o survey sa mga nangaging mga tuig sa mga drug addicts sa Pilipinas.
Ingon sa ilang mga survey, ang pinakadako nga pagdaghan sa mga drug addicts, nahitabo niadtong 1999 hangtod 2004 kay ang mga drug addicts miabot ug 3.4 million hangtod 5.8 million ug sa pinakataas nga 6.7 million.
Sa mga tuig 2008 hangtod 2015, sa ilang estimate, ang mga drug addict miabot ug 1.7 million, 1.3 million ug 1.8 million. Base sa pagtuon sa DBB, ang mga drug addicts sa miaging mga tuig, nagkagamay o nagkakunhod.
Pastilan! Karaan ang numero ni Presidente? Kinsa may mihatag kaniya ug impormasyon?
Niadtong Oktuber 18, ang Reuters, usa ka international news agency, mihimo ug special report mahitungod sa ilang giingon nga dubious data o kadudahan nga impormasyon sa mga drug addicts.
Ilang gipangutana ang PDEA bahin sa pag-“overestimate” ni Presidente.
Mitubag si Wilkins Villanueva, ang Metro Manila regional director sa PDEA nga okay lang nga mo-exaggerate o mopakapin sa iyang mga numero si Presidente.
Ingon siya nga dili man kini problema. Maayo gani para makahibalo ang mga tawo nga problema gayod ang druga.
Miingon siya, kaniadto ”lonely battle” ang pagsugpa sa druga. Pero tungod sa Presidente, daghan na ang gatabang, apil na ang mga komunidad.
Ingon pa niya nga nag-exaggerate lang si Presidente aron mahibaw-an nga daku gayod ang problema ug kinahanglan nga motrabaho pa gayod sila.
Pastilan! Okay lang mo-exaggerate? Ang palyado nga mga numero daghan ug implikasyon.
Kung sayop ang imong ihap, masayop pud ang imong pagbudget ug paggahin sa imong mga resources.
Sama ra gud kun ikaw nagpreparar ug budget sa usa ka kasal. Kung 100 ang imong giimbitar unya P100 per plate, gikinahanglan nga duna kay P10,000 nga iandam nga bayad sa caterer.
Kung 1.8 million ang drug users, 1.8 million lang ang target sa pagtokhang o target nga ipasurrender. Dili kapin sa 3 million. Maiingon nga okay lang nga sayod ang mga numero kung kini bahin lang sa kwarta.
Pero kung kinabuhi na ang maapil, dili sakto nga sayod ang mga numero.
Kung patyon ang mga drug addicts, (exaggerate o pasobra pud ni nga pagkasulti?) mga 1.8 million lang ang patyon. Pero, kung nagtoo ka nga kapin sa 3 million, daghan na kaayo ang sobra nga mapatay, maapil na gayod kapin sa million nga mga inosente.
Pastilan! Unsa kahay sakto nga mga numero?
Importante nga sakto ang mga numero kay kinabuhi ang nalambigit. Sa ako nga nasulat na, bisan ug usa ra ka inosente ang nasayod pagpatay, it is one too many.