Tropa-tropa kuno

“TROPA, tropa! (troops, troops).” Mao ni ang gisinggit sa gigukod sa mga pulis diha nga napusilan na sila sa may tiyan, una sila natumba.

Dakung kurat sa mga pulis nga mitubag sa pangayo ug tabang nga gukdon ang mipusil sa usa ka crime crusader sa Mindoro niadtong Oktubre 9 dihang ilang nahibaw-an nga pulis pud diay ang ilang gigukod ug naingkwentro.

Nasorpresa gayud sila pagkahibalo nga ang gunmen nga nag-riding in tandem sa usa ka motorsiklo mga opisyales sa kapulisan nga sila si Senior Insp. Magdaleno Pimentel Jr. ug Insp. Makson Almeranez.

Si Pimentel sakop sa Oriental Mindoro Police Public Safety Company, samtang si Almeranez mao ang hepe sa kapulisan sa lungsod sa Socorro, Oriental Mindoro.

Basi sa imbestigasyon, si Pimentel nagsul-ob ug ski mask ug siya ang nag-drive sa motorsiklo ug si Almeranez gasul-ob ug wig aron ma-disguise siya.

Pastilan! Ngano man nga ilang gipusil ug gipatay si Zenaida Cruz, nga usa ka anti-crime crusader? Dili ba ka-tropa sa mga kapulisan ang mga crusader sama ni Cruz?

Si Cruz, 51 anyos, mao ang regional head sa Citizens Crime Watch (CCW).

Pila ka oras una siya gipusil, nakadawat ug text message si Cruz. Ang wa magpaila nga sender miingon nga apil siya sa mga pagpatay sa duol nga lunsod sa Bongabong.

Nangayo siya ug tabang kang Cruz aron tagaan ug proteksyon ang iyang asawa ug anak.

Giingon nga maghulat siya sa gawas sa iyang balay sa nagpadala ug text didto sa Barangay Maligaya sa lunsod sa Gloria, Oriental Mindoro.

Lipat lipat lang diay tong text message o paon lang.

Kay samtang gatindog si Cruz dapit sa atubangan sa iyang balay, may motorsiklo nga miagi ug usa sa mga riders mipusil niya. Gipusil pud sa gunman ang iyang cellphone nga nahulog sa yuta.

Ang mga witness mitawag ug tabang sa mga pulis ug ang mga gunmen na-corner sa mga miresponde nga mga pulis mga tulo ka kilometro ang gilay-on sa ilang Cruz, ug nagpinusilay ang mga pulis ug gunmen.

Pastilan! Pulis versus pulis diay ang engkwentro.

Niadtong miaging bulan lang nga gipasidunggan si Almeranez nga usa ka outstanding policeman nga mismo si PNP Director General Ronald dela Rosa ang mi-pin sa iyang medal didto sa Calapan. Sila si Almeranez ug Pimentel mga graduates sa Philippine National Police Academy.

Mao ni nga nalibog gayod ang mga imbestigador ngano man nga ilang gi-murder si Cruz? Tungod kay dunay nahibaw-an si Cruz nga makalambigit sa kapulisan? Tungod kay duna siyay livelihood program para sa mga drug addict nga gusto na magbag-o sa ilang kinabuhi? O, tungod kay nagsideline ang duha ka opisyales sa kapulisan nga isip mga vigilantes o guns for hire?

Ang pagpatay ni Cruz nahitabo wala pay semana sukad nga gipamantala sa The Guardian, usa ka sikat nga international news organization nga naka-base sa London, ang usa ka exclusive report nga gaingon nga matud pa sa usa ka police officer, ”secret police teams are partly responsible” sa mga napatay sa drug war ni Presidente Duterte. (https://www.theguardian.com/world/ 2016/oct/04/philippines-secret-death-squads-police-officer-teams-behind-killings)

Pastilan! Apil sa mga secret police death squad sila Pimentel ug Almeranez?

Gipasakahan na ug kasong murder sila si Pimentel ug Almeranez. Pero, tungod kuno sa ilang mga samad, dili pa sila kasulti ug wala pa silay nahimo nga statement.

Ingon pa sa latest balita, duna pay gipangita nga two ka suspects nga apil sa pagpatay. Ingon sa mga witnesses, sila ang sakay sa ikaduhang motorsiklo nga uban sa motorsiklo nila Pimentel ug Almeranez.

Isog man kaayo ang atong presidente ug police chief. Paspas pud ug ang ilang mga lihok. Unta mopursige gayod sila sa pagsolbad sa pagpatay ni Cruz ug walay whitewash nga mahitabo.

Sa pagkakaron, kapin na sa 3,700 ang napatay ug kapin sa 2,150 ini ang napatay sa mga vigilante.

Pulong pa sa usa ka kauban ni Cruz sa CCW, “The police are behind the killings. These are uniformed cops disguising as vigilantes,”

Pastilan! Walay paglaum matagaan ug hustisya si Cruz?