Los Baños ‘shabu queen’, 17 iba pa arestado sa drug raid
ARESTADO ang isang babae na tinagurian ng mga pulis na “shabu queen” ng Los Banos, Laguna, kasama ang 17 iba pa matapos ang isinagawang sunod-sunod na raid kahapon ng umaga.
Isinilbi ng mga pulis ang siyam na search warrant na ang target ay ang mga sinasabing tulak sa mga barangay ng Bayog at San Antonio, alas-2:30 ng umaga, ayon kay Supt. Vicente Cabatingan, Los Baños police chief.
Sinabi ni Cabatingan na narekober ang P100,000 halaga ng shabu at drug paraphernalia mula sa mga suspek.
Kabilang sa mga naaresto ay sina Rosalina Lumaybay, na tinagurian ng mga pulis bilang “shabu queen” sa bayan at pinuno ng Lumaybay drug group.
Naaresto rin sina Mark Rivera, Rolando Decena, Gerardo Presa, Gimiliano Tandag, Roberto Lumaybay, Carlo Bustamante at Emelita Eusebio.
Nakatakas naman ang isa pang suspek na si Ricardo Maranan.
Sinabi ni Cabatingan na nabuwag ng mga pulis ang Lumaybay drug group, na nagsusuplay ng ilegal na droga sa Los Baños at kalapit na mga bayan ng Bay, Victoria, at Pila.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.