ONE thousand pesos kada litok.
Mao kini ang presyo nga mismo si Presidente Duterte ang miingon niadtong Disyembre nga iyang ibayad taga sulti niya ug PI (p..ng ina) o kada pamalikas niya.
Nahimong dakung isyu ang pagpamalikas ni kandidato Duterte paghuman niya nga gi-PI ang Santo Papa, ang pinakapangulo sa Simbahang Katoliko sa tibuok kalibutan, tungod kay natraffic siya ug pila ka-oras niadtong miduaw ang Santo Papa sa Pilipinas.
Mao nga nangayo siya ug pasaylo sa mga opisyales sa Simbahang Katoliko ug miigon na mohatag siya ug P1000 kada sulti niya ug PI o balikas sa Caritas Davao, usa ka organisasyon sa kaluoy nga gatabang sa nangahinahanglan.
Miusab siya ug saad una namumpa pagkapresidente nga mag-usab siya o mag-metamorphosis ug dili na mamalikas.
Pastilan! Wala may pagkausab.
Pirmi gihapon madungog ang PI gikan kang Presidente.
Taas na ang listahan sa iyang gi-PI ug gibalikas. Apil sa lista sila Senator Leila de Lima, American President Obama, US Ambassador Philip Goldberg, the European Union, the United Nations, UN Secretary General Ban Ki-moon.
Pila na kaha ang iyang ihatag o utang sa Caritas Davao?
Nakahatag ug diskurso si Presidente kapin 80 ka beses. Pipila lang ang walay PI o balikas – pananglitan, sa iyang inagurasyon, sa State of the Nation Address ug kadtong miadto siya sa sinaguga sa mga Hudeyo.
Dunay mga pamulong nga kapin 20 ang PI. Pero bisan ug ingnon nato nga 5 lang ka PI taga pamulong, moabot ug P400,000 tanan ang iyang utang sa Caritas. (Doblehon ang kantidad kung magsugod ug asoy sukad Disyembre).
Kun magpadayon si Presidente sa pamalikas hangtod sa pagkahuman sa iyang termino sa 2022, ang konservatibo nga banabana, kapin P8M ang iyang ihatag sa Caritas.
Pastilan! Ubay-ubay ang mabulahan.
Dunay man guy balita nga gaingon nga ang kwarta nga ihatag ni Presidente, gamiton sa Caritas pagpanghatag ug libre nga mga tambal.
Balikas pa more? Pastilan! Ayaw intawon kay dili lang si Presidente ang mobayad sa iyang pagpamalikas.
Ingon sa mga analysts, misadsad ang balor sa peso sa dolyar sa pinakaubos nga lebel sa pito ka tuig (panahon pa ni Presidente Arroyo) niadtong Septembre 26.
Unya, gikan Hulyo 4 hangtod Oktubre 4, ikaduha sa pinakadaku ang pag-ubos sa peso batok sa dolyar (sunod sa ringgit sa Malaysia) samtang halos tanang mga kwarta sa Asya mitaas ang bili batok sa dolyar.
Ingon sa usa ka opisyal sa Bangko Sentral ng Pilipinas, ang pag-ubos sa balor sa peso ‘‘sentiment-driven” ug tungod sa mga gimanulti ni Presidente bahin sa mga lider sa atong mga trading partner sama sa US ug European Union.
Ang mga gipanulti gipakasama sa ”unpredictable policy” o dili matag-an nga mga polisiya ug miresulta sa ”jittery market.”
Dunay mga mabulahan sa pag-ubos sa balor sa peso sama sa mga dunay madawat ngadolyar nga remittance ug kita sa exports.
Pero, sa kadugayan, tanan maingon nga maapektohan, kay ang pag-ubos sa peso, moresulta sa pagtaas sa presyo sa gasolina, kuryente ug mga palaliton.
May nag-ingon nga analyst nga kun way kausaban sa Presidente, mahimo na nga P50:$1 ang pagbaylo sulod sa tulo hangtod unom ka bulan.
Pastilan! Intawon, PI no more.