Laro Ngayon
(Smart Araneta Coliseum)
7 p.m. Meralco vs
Barangay Ginebra
— Game 6, PBA Finals —
ISANG panalo na lang.
Yan ang kailangan ng Barangay Ginebra para mapatid ang walong taong pagkauhaw sa kampeonato sa Philippine Basketball Association.
Lamang sa best-of-seven series ang Gin Kings laban sa Meralco Bolts, 3-2, at kung muling mananaig ang pinakasikat na koponan sa liga ay makokopo nito ang kampeonato ng PBA Governors Cup.
Tatangkain din ni Ginebra coach Tim Cone na masungkit ang kanyang ika-19 kampeonato bilang coach na siyang pinakamarami sa kasaysayan ng PBA.
Pero bago mangarap ng selebrasyon at magplano ng victory party ay may kailangan pang gawin ang Gin Kings ngayong gabi.
Kailangan pa nilang idispatsa ang Bolts sa Game Six ngayon o di kaya ay sa Game Seven.
Pero kung si coach Tim ang tatangungin ay ayaw na niyang ipagpapabukas pa ang koronasyon. Ngayon pa lang ay dapat tapusin na ng Ginebra ang serye.
Matapos na makuha ng Meralco ang 2-1 kalamangan sa serye ay tumuhog ng kambal na panalo ang Gin Kings kung saan sa huli nitong laro ay ang mga beteranong sina Jayjay Helterbrand at Mark Caguioa pa ang nagbida para sa koponan. —Angelito Oredo
Photo: Inquirer.net