NAGDIWANG ang dalawang Kapuso artists na sina Louise delos Reyes at Miguel Tanfelix ng kanilang kaarawan noong Setyembre kasama ang mga taong naging malaking parte ng kanilang career bilang artista.
Para kay Louise, mahalagang ibahagi niya ang kanyang nalalaman at talento bilang pasasalamat sa mga natatanggap niyang blessings at trabaho. Kaya naman nang nagdiwang siya ng kanyang kaarawan, nagsagawa siya ng isang photography session kung saan tinuruan niya ang kanyang mga fans ng ilang mga technique para makakuha ng magagandang litrato.
Unti-unti na kasi siyang nakikilala sa photography, at masaya siya dahil nalalaman ng ibang tao ang iba pa niyang talento bukod sa acting. Isa sa mga payo niya ay ang patuloy na pag-eensayo, “Practice makes perfect’ is a bit cliché, but it really works. Just be patient with yourself. Keep taking photos, and just do what you love to do,” ani Louise.
Samantala, hindi pa rin nakakalimutan ni Miguel ang ginampanan niyang role bilang Niño dalawang taon na ang nakalilipas. Naging malaking bahagi kasi ito ng kanyang career bilang aktor kaya laking tuwa niya na ipagdiwang ang kanyang ika-18 na kaarawan kasama ang mga bata sa New Hope SPED Center.
Naaalala pa rin daw niya ang mga pagkakataong nakihalubilo siya sa mga batang mentally-challenged at natulungan siya ng mga ito sa pag-intindi sa kanilang kondisyon. “Masaya po akong nakasama ko sila sa birthday ko. Nakita kong game sila sa mga activities and that really makes me happy” sey ni Miguel.
Dahil sa patuloy ang natatanggap nilang blessings at mga opportunity, hindi na humihiling pa ng materyal na bagay ang dalawa. Mas gusto raw nilang hilingin ang nakabubuti sa nakararami at ang kaligtasan ng kanilang pamilya at mga mahal sa buhay.
Napapanood pa rin ang binata sa weekly romantic series na Usapang Real Love at comedy show na Ismol Family kasama ang ka-loveteam na si Bianca Umali.
At habang inihahanda ang bagong soap opera nila ni Bianca, mapapanood muna si Miguel sa fantaseryeng Encantadia sa GMA Telebabad bilang isang Mulawin kasama pa rin si Alden Richards na gumaganap naman bilag si Lakan.