KUNG nabitin kayo kagabi sa episode ng GMA Telebabad series na Alyas Robin Hood starring Dingdong Dantes, Megan Young and Andrea Torres, narito ang mga eksenang dapat n’yong tutukan ngayong gabi.
Maiiyak si Judy (Jaclyn Jose) nang makitang buhay si Pepe (Dingdong). Desidido naman ang binata na patuloy na magtago hanggang sa hindi niya napapatunayan kung sino ang tunay na pumatay sa kanyang ama.
Ibibigay sa kanya ni Jekjek (Gio Alvarez) ang ginawa nitong bow and arrow kay Pepe.
Kukuntsabahin naman nina Chino si Adelita (Tanya Gomez) na mag-distribute ng mga zombie pills. Ang may-ari ng pabrika ng zombie pills at ng antidote nito ay walang iba kundi si Wilson (Dennis Padilla).
Ang plano ni Wilson, magbenta ng maraming zombie pills at kapag naging mala-zombies na ang mga gumamit nito ay saka siya magbebenta ng antidote na abot-langit ang presyo. Matutuwa si Adelita na makasama sa bagong business.
Samantala, isa palang mahusay at high class na magnanakaw si Venus (Andrea). Nanakawin niya ang Black Pearl Triad sa event. Mabilis na maise-secure nina Daniel (Paolo Contis) ang lugar nang matuklasan nilang nawawala ang Black Pearl Triad.
Dahil nasa loob pa si Venus ay pupunta siya sa loob ng ladies room. Palalabasin niya si Sarri (Megan) at sasabihin ditong may sunog sa museum. Ila-lock niya ang pinto as she thinks of a way out. Makakapasok naman sa loob ng ladies room si Daniel at ang ibang mga pulis.
Magkakaayos sina Lizzy (Lindsay de Vera) at Julian (Dave Bornea) nang inamin ng huli na hindi naman niya alam na ang kaso na hawak ng kanyang ama ay ang kaso ni Pepe. Pero biglang may zombie man na lalabas. Hinahabol nito si Ekay (Caprice Cayetano), anak ni Jekjek, at si Lola Huleng.
Darating si Pepe at gagamitin ang husay niya sa pakikipaglaban para iligtas sina Lola Huleng. Dito niya rin gagamitin sa unang beses ang bow and arrow na gawa ni Jekjek laban sa zombie man. Kukuhanan naman ni Julian ng litrato ang naka-hood na si Pepe. Tatawagin naman siyang Robin Hood ni Lola Huleng. Biglang darating ang maraming tao. Cornered si Pepe. Hindi siya pwedeng makilala nina Lizzy, Julian, Lola Huleng, Ekay at ng iba pang mga tao sa paligid.