KATHRYN BERNARDO AT DANIEL PADILLA
SIGURADONG pinatikim na naman nang maaanghang na komento ng ibang AlDub fans si Kathryn Bernardo sa paglabas ng totoong bersiyon ng balita na si Alden Richards ang humanap sa young actress nang minsang magkasama sila sa party ng isang kumpanyang may-ari ng notebook na sila ang tagapag-endorso.
Paglabas ng retratong magkatabi sila na malaki naman ang kanilang pagitan ay binulabog na ng ibang mga tagasuporta ng AlDub si Kathryn. Nakakaawa naman ang batang aktres na nananahimik sa kanyang kinauupuan.
Kung anu-ano nang masasakit na salita ang ipinakain sa kanya ng mga fanchitang palaaway at hindi nagdadalawang-isip, tinawag agad siyang malandi, mang-aagaw at kung anu-ano pang negatibong paglalarawan.
Sa halip na ganu’nin si Kathryn ay dapat pa nga silang matuwa dahil napakamaginoo ng kanilang idolong si Alden. Gumawa ng effort ang Pambansang Bae para makapagbigay-pugay sa kanyang kapwa modelo ng produktong ineendorso nila.
Tama lang ang naging desisyon ni Alden na puntahan ang dalaga, ganu’n ang marespetong lalaki, dapat lang na huwag makinig ang guwapong aktor sa idinidikta ng ibang mga tagahanga nila ni Menggay. Ano ito, lokohan, kailangang ang ka-loveteam lang niyang nganga nang nganga ang kanyang lalapitan?
Kahit sino na lang na lumapit kay Alden ay malandi na agad-agad, hindi ba puwedeng nagpapakamaginoo lang naman si Alden, kaya nakikipag-selfie siya sa mga kapwa niya artista?
Hay, naku! Ang ulo ay ginagamit, hindi lang ‘yun gapangan ng mga kuto!