Anuman ang maganap, sinuman ang makabangga ng kahit sino sa kanilang dalawa, maaasahan nang magkahawak-kamay ang magkapatid.
Kahit sa kanilang engkuwentro laban sa bunso nilang kapatid na si Claudine ay matagal nang magkakampi sina Gretchen at Marjorie, nagkaroon nu’n ng pagkakataon na si Gretchen ang nakabangga nina Marjorie at Claudine, pero sa bandang huli ay sina Gretchen at Marjorie pa rin ang lumulutang na talagang magkabagang sa magkakapatid.
Mukhang sa mga panahong ito ay meron na namang hidwaan ang magkakapatid.
Magkakampi uli sina Gretchen at Marjorie, kalaban na naman nila ang bunsong si Claudine.
Ayon sa aming source ay may kinalaman ‘yun sa pagpasok sa showbiz ng anak nina Dennis Padilla at Marjorie na si Julia, napakaganda ng teenager na anak ng nagkahiwalay na mag-asawa, mag-aartista na talaga ito ngayon at magpapaalaga rin sa Star Magic.Mukhang naamuyan nina Gretchen at Marjorie na may kung anong pinagsasasabi si Claudine tungkol du’n, haharangan kuno ng bunsong Barretto ang pag-aartista ni Julia; lalo na ang pag-entra ng dalagita sa Star Magic kung saan nagreyna-reynahan nu’n si Claudine.
‘Yun na! Nagsimula na uli ang “giyera” sa pagitan nina Gretchen at Marjorie kontra kay Claudine.
Meron na namang mga parunggitang nagaganap ngayon at sa pananaw ng mas nakararami ay pinagtutulungan ng mag-utol ang kanilang bunsong kapatid.
Ang mga Barretto pa naman kapag nag-aaway, napakasosyal ng kanilang mga parunggitan, para silang mga palengkerang nakabihis lang at kuntodo alahas.
Nakakaaliw silang tingnan, nakukuha nila ang atensiyon ng publiko sa kanilang mga sosyal na pagbabangayan, pero ang nakatutuwa ay magkakakampi pa rin silang tatlo kapag iba na ang kanilang kalaban.